前南非總統曼德拉（NelsonMandela）生於一九一八年七月十八日，上星期五慶祝九十歲壽辰，喚起全世界一片祝福讚美之聲。曼德拉曾坐牢二十七年，堅持反種族隔離，反種族歧視，卒成為南非第一位透過真正民主選舉而成為總統嘅黑人，現在兒孫滿堂，生活幸福，可說福祿壽全歸，可賀也。
曼德拉乃理想主義者，一生追求公平公義公正，慶祝生日之日向傳媒表示：「南非有很多有錢人，他們可以跟那些不太幸運，無法擺脫貧窮的人分享他們的財富。」冇人說財富分佈不均係對嘅，但假若政府無政策讓貧窮人脫貧，讓窮人透過教育、勤奮而脫離貧民區，而只係識得叫有錢人與窮人分享財富，呢個國家必定兩頭唔到岸，斷送大好前途。最公平嘅「均富」政策就係「均窮」，如毛澤東搞人民公社年代，人人冇飯食，除咗解放軍與幹部之外。2008年中國之堅尼系數一定高過一九六○年，但全國朝氣蓬勃，青年人滿懷希望，國力大張。
曼德拉治國，最大成就係和平解決種族與部落紛爭，由種族隔離和平過渡至黑人掌政。但在實務上，佢與繼承人姆貝基都係唔多掂，全國盜賊如毛，治安不靖，搶匪殺人唔眨眼，除咗倚賴傳統礦產之外，點樣發展工商業呀？呢日食午飯，大家一齊講起曼德拉與南非，經濟專家E話佢四年前曾到南非考察投資環境，發覺南非風景優美，大地遼闊，確實係好地方，可惜治安好唔掂，佢到某大機構訪問會談之後，想話步出大門外搵司機，立即俾主人家喝住，用手機叫司機將架車駛到門外馬路，然後由兩名實Q左右兩旁護住，急急衝出門口上車，司機立即踏油門，經濟E為之面青。遇到紅燈，有黑人行埋嚟，司機立即衝燈而走！船務C三年前參加南非旅行團，旅遊巴士在餐廳門口停低，團員急急腳行入餐廳，白人司機停車熄匙後，一個人行入餐廳之時，突然就俾匪徒搶劫打傷咗。呢啲係舊事嘞，今日又如何？久唔久睇番新聞，華人與中國外交人員被打傷、打劫者，時有發生。專家E話：「我好尊敬曼德拉，但南非絕非一個值得投資或去旅行嘅國家。曼德拉並無令南非人民生活轉好！」