黑莓首推3.5G　鬥串

唔知大家有冇印象，寸爆嘅SteveJobs曾經將iPhone3G跟Nokia及Tero兩款手機作比試，仲鬥快撈網頁㖭！呢邊廂，同樣啱啱公佈第一款支援3.5G嘅黑莓（BlackBerry），表現相對低調；佢不作比較，慷慨地只集中介紹呢粒最新CPU同埋超闊屏幕，上網睇串流感覺好爽。贏晒全世界又點？睇影像串流，夠靚、夠順咪得囉！

記者：陳國輝
攝影：譚盈傑

內置1GB僅抄歌

呢款黑莓手機，命名為Bold，原意係指佢「擁有誘人及自信嘅設計，並集非凡速度、性能和多功能於一身」咁解！剛才提過，Bold無論撈網頁抑或欣賞即時串流，除咗HSDPA技術，亦要歸功於新一代嘅624MHz流動處理器，令速度大為提升。當然，睇串流梗唔少得靚芒，Bold採用Half-VGA屏幕，解像度高達480×320，再用近似16:9的橫向設計，睇電影更逼真，同時有更廣闊嘅空間瀏覽網頁。

近期，黑莓屢次加強Mult-Media功能，今次還刻意將內置容量提升至1GB，俾你抄歌或儲存Email；但貪心啲想單撈大量程式及電影，咁就要用埋機側microSD卡槽，更嚇人係佢竟支援高達16GB超大容量，呢款記憶卡連街舖都未有得賣，似乎新過龍喇！

■每粒按鍵中間凸起，方便快速輸入文字。

■利用橫向設計嘅屏幕睇片，視覺上震撼啲。

■支援GPS衞星導航，可惜得英文街名。

仿皮殼晒華麗

以前覺得黑莓恰似一部鬼佬專用機：又大件、又重、又多掣；但自從Pearl推出後，外形變得纖細，方向鍵更用一粒「明珠」來代替，凸顯一份女人味。但係，今次Bold唔搞女性化，換個角度主攻成熟穩重型男士，特別係機背採用黑色仿皮設計，質感完全變晒。不過咁，雖則話手感舒服咗，但老問題依舊存在，尤其係佢好易刮花，或者當你手濕用機嗰陣，亦會令到質感變差，所以喺保養方面要多加留意。