天窗幾成必備配件，雙天窗、三天窗，甚至天幕式，全靠佢我哋先可以嘆住冷氣享受開揚嘅駕駛感。不過，當OpelAstra1.8GTC一出現，各式天窗統統Out！1.8平方米、伸延至車頂嘅擋風玻璃，猶如大銀幕展現眼前，寒酸天窗仔，行埋一邊啦。
記者：黎頌詩
攝影：楊錦文
Model：Winnie
只此一家開揚感
攞住AstraGTC嘅公關照，睇住全景擋風玻璃PanoramaWindshield嗰隻震撼，幾個愛車同事先係一輪嘩嘩聲，然後就七嘴八舌。「同女朋友喺車度咀咪好揚！」「好曬啫！」「得塊玻璃會唔會唔穩陣㗎……」查查料，再上車睇真啲，可以肯定，擔心實屬多餘！呢個咁突破嘅設計，其實早於04年嘅巴黎車展中已經化概念為現實，與GTC一起登場。面世至今，攞獎一大堆，當然唔係單靠賣相攞分。厚6mm嘅安全玻璃，撞擊安全指數達歐洲最高嘅五星標準，在嚴重撞擊下，亦唔會裂成碎塊。怕曬？一樣有計！玻璃本身可阻擋30%陽光，想多啲私隱，拉出隱藏於車頂後半部嘅頂冚，擋風玻璃大小，可以由你個人控制，最有趣係嗰塊裝於玻璃上，視覺上恍如凌空嘅後鏡。
變身前後
全面運動化
以PanoramaWindshield做賣點，本來已經叫人眼前一亮，不過相比起Hatchback，Astra1.8GTC仍然於多個方面有所改良，喺造型同性能上，全面運動化。外觀上，你大概找不出Hatchback和GTC嘅分別，其實GTC嘅底盤同車身都被調低，胎軨由16吋增至17吋，加上避震方面亦有改良，不論在外形或操控性上，都提升咗跑格。內櫳嘅改變就較明顯，原本中控台等位置嘅鋼琴木飾全部被電鍍物料取代，腳下則係典型嘅跑車腳踏，仲有手感更強嘅GTC獨有厚身軚環及用色更醒目嘅錶板。比起Hatchback小品式斯文高雅，GTC明顯係跑味爆發……仲有一個驚喜位：車價唔使25萬！
規格
引擎：1,796c.c.直4
馬力：140bhp/6,300rpm
扭力：175Nm/3,800rpm
傳動：4前速自動波
查詢：合朗汽車（27608668）