大劉猛將華置（127）銷售經理任建華（Peter），上個禮拜四喺淺水灣自己架車內燒炭自殺身亡，集團高層一直都冇發表過任何個人意見。華置噚日為灣仔新盤YorkPlace搞記者會，完成任建華餘下工作，仲由大劉個仔、集團執行董事劉鳴煒親自見記者。在場記者梗係想問佢對件事嘅睇法，佢即刻好嚴肅咁話，只會答呢條問題一次。大劉仔話：「Peter係一個優秀員工，自己就佢嘅死感到遺憾、傷心、可惜，公司已經協助緊佢屋企人辦理身後事。𠵱家公司有足夠人手去做YorkPlace同其他樓盤銷售工作，唔使搵人接替佢嘅位。」大劉仔答完之後，在場記者都好識做咁冇再追問落去，冇再講任建華。