受美國次按爆煲拖累，全球信貸緊縮，令環球經濟增長出現放緩。據中國證券網報道，阿里巴巴（1688）主席馬雲前日夜晚透過公司內聯網，發出以《冬天的使命》為題嘅內部電郵，號召阿里巴巴全體員工準備「過冬」，迎接嚟緊嘅經濟寒冬，佢話：「全球經濟將進入非常困難的時期，預計這『冬天』將非常漫長。」
其實呢番「過冬論」，馬雲唔係第一次講，早喺舊年12月，佢就曾經喺一個論壇提到「過冬」，仲好坦白話「阿里巴巴上市的一個重要原因，是為了融資給『過冬』做準備。」
其實馬雲都好有先見之明，趁住舊年市況好時上市，吸引散戶追捧，仲調高招股價，集資131億港銀，呢筆資金應該夠過冬。
馬雲有錢「過冬」，不過散戶就要「捱凍」，點解？家陣阿里巴巴已經跌破13.5蚊招股價，噚日收市得番9.9銀，認購1手嘅散戶就唔見1800蚊。