樓市轉靜，搞到地產經紀行要裁員，由於最近好多經紀都冇單開，仲驚緊自己會唔會係下一個開刀對象，成行都冇晒士氣。聲言不裁員嘅美聯（1200）噚日宣佈，為咗激勵士氣，即日起至月底，所有美聯及子公司港置開單同事都有錢分，獎金係就係奀啲，開租單同買賣單，分別都只係得180蚊同280蚊，但行政總裁陳坤興話，獎金多少唔重要，主要係推動士氣，乘機寸對家，「人哋搞到裁員兼出警告信，我哋就雪中送暖」。若本月分行營業額過百萬，仲可分1668蚊獎金。
至於裁員嘅中原亦話要激勵員工士氣，推出咗個連環獎上獎，5至7月最好數嗰30位經紀，就可得1000蚊獎金。子公司利嘉閣，本月一、二手組嘅營業額，若分別達到20萬同30萬銀，就可得3000蚊獎金。
最近冇乜人買樓，搞到班經紀無所事事，好多代理行高層都鼓勵員工轉攻租務市場，雖然做一單租盤生意，收嘅佣金比做買賣奀好多，咪密食當三番，好過踎喺公司數手指。