落場踢波最緊要搶鏡，但後日（27日）尼日利亞上演嘅「社區盾前哨戰」，曼聯同樸茨茅夫兩軍億萬球星就千祈咪制，一來怕被瘧蚊「叮中」，二來怕綁匪「睇中」，你話邊有心情踢波呢？
演社區盾前哨戰
英超越搞越大，全球覬覦呢隻金蛋，望分一杯羮，尼日利亞更係全球第4大紅魔粉絲基地，故今夏就搞咗三角賽，邀請該英超兼歐聯盟主，以及英足盃冠軍樸茨茅夫「拍跳」。禮拜六，坐擁大量非洲球員嘅樸茅會先同尼國雙料冠軍「簡奴之柱」（KanoPillars）踢頭場，而禮拜日嘅重頭戲就係「社區盾前哨戰」，由紅魔鬥樸茅。
然而，由於樸茅答允首戰對東道主「簡奴之柱」，會派強陣如占士、簡奴及烏達卡等披甲，希望一盡「客軍之誼」，而紅魔就禮拜六喺南非踢完場友賽，趕去尼國參加派對，故此呢場所謂「社區盾前哨戰」，分分鐘慘變「社區盾青年軍」對峙。
經過阿仙奴中堅高路托尼俾蚊叮患上瘧疾後，曼、樸球星真係要緊記香港政府勸告，即使唔願喺三十幾度高溫下着淺色長袖衫褲踢波，出場前最好噴定驅蚊劑，該國無幾耐前先爆過霍亂喳。
尼日利亞局勢混亂
但求大俠最憂心仍係呢班億萬之軀，你知尼日利亞局勢「立立亂」，治安麻麻，之前就有騙子扮曼聯球探呃錢，更有油田俾游擊隊襲擊，間接將推至歷史新高，真係要幾狼有幾狼；愛華頓中堅尤保嘅親弟曾經被綁架，假若班球星萬一俾非洲綁匪「睇中」就弊家伙喇。
據主辦單位表示，呢兩日可吸引到5,000名歐洲球迷千里迢迢遠赴非洲觀戰，6萬人嘅球場會座無虛席，屆時啲保安真係要睇實班球星喇！