電影《蝙蝠俠—黑夜之神》（TheDarkKnight）上星期喺香港上畫，即刻成為本年度中西片開畫日票房最高嘅電影，由於有一直盛傳已經打入荷李活嘅陳冠希（Edison）演出，雖然佢嘅演出只得3秒咁大把，但都足夠成為城中熱話嘞，就連前晚由吳君如主持嘅商台節目《嘩！嘩！嘩！打到嚟！2008》都拎呢件事嚟講。
陳可辛睇唔到
昨日凌晨君如個節目請咗導演李力持做嘉賓，大講對呢套戲嘅睇法，當講到大家睇唔睇到只得3秒戲份嘅Edison時，君如就話佢眼利一早睇到，反而一齊睇戲嘅老公陳可辛就睇極都睇唔到，而李力持就即刻語帶嘲諷咁話：「唔知佢使咗幾多錢去疏通呢？早知我介紹媚姨畀佢識啦，媚姨嗰件老臨咪係做樓下大堂保安員嗰個囉，佢仲有兩句對白㖭！」吳君如接住話：「同埋個老臨仲多幾個鏡頭，呢個老臨我哋同佢拍過好多戲㗎。」估唔到身為潮人兼略有名氣嘅Edison，佢嘅戲份竟然唔及一個臨記，又難怪會俾人明寸嘅！
農夫等見老闆
此外，男子組合農夫噚日喺九龍灣綵排下個月2號舉行嘅「芝華士農夫舉高隻手演嘢會」，同場仲有堪輿學家麥玲玲、方大同同林一峰，講到有消息話陳冠希秘密返港，為農夫嘅演嘢會做最後準備，農夫不諱言雖然同老闆陳冠希有聯絡，但只限工作，佢哋話：「平時佢都係叫我哋畀啲心機，緊張演嘢會嘅內容。」
問農夫知唔知陳冠希返咗香港？佢哋話：「好難講喎！唔通你成日sendemail問你老細喺邊度，掉番轉鼓勵佢畀心機做嘢咩！我都唔知佢係咪返咗嚟，又唔知佢係咪會嚟睇，或者你抱住買六合彩嘅心情嚟睇，見到佢咪當中頭獎，如果唔係，咪當中安慰獎嚟睇我哋。」問農夫想唔想陳冠希嚟捧場？佢哋話：「咁梗係想啦！」農夫喺演嘢會各自帶領一班舞蹈員對跳，雖然每日連續排舞15個鐘，休息時間唔多，不過佢哋有信心可以應付得嚟。
