為承接《酷愛》的聲勢，張敬軒最近推出的新碟《UrbanEmotions》做情聖，唱盡都市人各種感情。當中有親情、婚外情，也有憶故友JC的友情之歌。還挑戰張國榮的《左右手》，唱出題材敏感、疑似同性戀的歌曲，軒仔說：「我只希望我嘅音樂唱出不同人嘅故事。」
張國榮主唱的《左右手》，歌詞「從那天起我不辨別前後，從那天起我竟調亂左右」大膽地唱出同性戀的心聲。同樣傳過是同性戀的張敬軒，新碟中的《隱形人》，似是提及斷背情，但歌詞比《左》隱誨。
軒仔笑說：「唔知係咪同性戀緋聞形象深入民心，今次好幾個第一次合作嘅音樂人，分別交歌都係有關呢啲題材，之前佢哋完全冇接觸過我，我感覺被定咗型，覺得我係代言。」
至激版本留畀自己
原來這首歌有兩個版本，最後軒仔把「溫和版」收錄在唱片中，他說：「激啲個版本留番自己唱，我唱首歌，聽眾要點諗我都唔會理，如果佢唔信你，你講乜都唔信㗎啦！音樂同個人生活冇直接關係。」
關懷家人憑歌寄意
唱出甚有意思的歌，軒仔為了銷量、成為話題而唱？還是想取代哥哥於同性界別之地位，他說：「兩樣都唔係，呢隻碟係唱都市人嘅感情，未必一定係我嘅心態，我並唔希望將呢樣嘢嚟炒作。」
另外，軒仔新碟中亦有不同感情主題的歌，友情及親情則是個人心聲。《酩酊天使》是送給去世的攝影師老友JC，他說：「有時我都覺得佢仲喺我哋班朋友身邊，佢走咗對我影響好大，令到我覺得要珍惜時間，鍾意乜就做，唔好畀藉口自己。」而《重覆的情節》則是寫及他對家人的關懷：「希望我能夠多啲時間返屋企陪佢哋，同佢哋食飯。」
採訪：王連連
攝影：陳順禎
場地：BeoRestaurant
服裝：React
化妝：Hettykwong
髮型：AaronKwok@HipHairCulture
