港姐股神葉翠翠聲稱炒股發達，那管他人質疑她錢從何來，買3,000萬豪宅是不爭事實，好不架勢。同屆港姐亞軍陸詩韻同人唔同命，還自嘆被港姐黐富豪的傳聞拖落水，自己想中六合彩又未有福份，不似翠翠炒股出位、自信浮面，「有錢、冇錢，唔需要同人講嘅。」一席話句句有骨，寸爆港姐股神。
葉翠翠炒股炒到豪掃共值3,000萬的兩豪宅，神奇發達匪夷所思，但又有傳她背後獲富豪做靠山，姑勿論她的真正收入來源如何，其發迹史確已成為城中熱話，與她傳不和的同屆港姐亞軍陸詩韻，日前在尖沙嘴接受本報訪問時，對葉翠翠談笑用兵，句句窒到應。
「我都望中六合彩」
當日話匣子一開，陸詩韻先跟葉翠翠劃清界線，她說：「我唔想相比，根本型格唔同，比拼幾多身家咩？唔好儍啦，大家做嘢、點樣賺錢好，都有唔同方法，我又唔識股票嘅，炒親都衰。」
問陸詩韻是否相信葉翠翠憑炒股炒到買千萬大屋？她說：「我唔敢評論，但佢不嬲係個幾拼搏嘅人，好醒目好叻，不停改變緊自己。我唔理佢點賺錢，佢有佢本事就得囉。」
葉翠翠自稱買中國人壽令她賺了第一桶金，陸詩韻卻沒有效法她買同一股票，她說：「所以賺唔到錢囉，好多人希望一朝發達，我都希望中六合彩，但暫時未享受到呢個福份，食住老本用雙手做嘢先啦，至多努力啲囉，我唔鍾意啲人用手段，我好羨慕張曼玉，佢好叻，搵到錢識得享受生活，唔覺得佢囂、佢寸，對人依然有禮貌。」
葉翠翠發達後做了風頭躉，比前自信得多，陸詩韻笑道：「一個人炒股炒到咁叻、炒到咁出名，賺到咁多錢，畀我都自信啦，好正常嘅。掉番轉我賺到錢，講句嘢都大聲啲啦，但我會盡量低調。一個人有錢、冇錢，唔需要講嘅，謙厚、實際嘅人更加緊要，同埋我唔希望每次傳媒追訪嘅係你今日賺幾多錢？買乜嘢股票？你個袋係乜嘢牌子？我唔係名媛、唔係ball后，唔想樹立一個咁嘅形象，都係工作至上好啲。」
厭煩黐富豪傳聞
葉翠翠一朝發達，同時令人將港姐黐富豪的傳聞扯上關係，曾跟富豪曾文能傳緋聞的陸詩韻，被問到會否受葉翠翠的富豪傳聞困擾時，她直認說：「唔多唔少都有，我覺得有啲無辜，我靠自己雙手搵錢嘅人，好無奈。我最唔鍾意啲人話港姐黐埋富豪，覺得俾人誣衊，我都係正常人，都會拍拖，我對呢樣好認真，我玩唔起，亦都唔識得玩手段，但我亦都好保護自己，我由細到大都係信自己多過信男人，我有嘅嘢都係自己一手一腳賺番嚟，冇人幫過我任何嘢，我好proundof自己。」
採訪：朱倬誼
攝影：林德雄 髮型：Martin
服裝：RebeccaTaylor
場地：Cucina@馬哥孛羅香港酒店