北京奧運殺埋身，多咗港人買投影機睇高清數碼廣播。唔講唔知，買啱一款合適嘅投影幕，先至發揮到高清投影嘅威力，否則調極部機都唔夠sharp。早幾日，小藍請教一位AV專家，佢就係AVConsultant嘅瑩瑩，聲如其名，嬌滴滴好鬼好聽。
須顧及家居大小
瑩瑩話，揀一款啱自己嘅投影幕，要顧埋家居環境。第一步要揀幕嘅大細。以高清投影機計，選擇投影幕嘅尺寸標準，觀看距離係投影幕高度嘅三倍，好似80吋嘅投影幕，高度係36吋，觀看距離要有9呎，「個廳距離唔夠，買大咗，會有好大壓迫感，特別係女仔會易睇到暈」。
投影幕又分為灰幕同白幕，如果屋企牆紙比較光，應該揀灰幕，防止反射光；牆身較暗就當然揀白幕。佢話，一旦揀錯咗影響好大，「好似應該用白幕，揀錯灰幕，畫面唔夠光，黑位層次唔夠分明；掉番轉揀錯白幕，畫面變得好刺眼，立體感唔夠，好似有一陣霧咁，冇咗黑位」。
佢又話投影幕設計分為手拉幕、梗幕同電幕。最平係手拉幕，入門級最抵用係日本品牌，80吋賣$5,000，100吋賣$6,000，但手拉幕嘅唔好處，係拉得多會出現V形嘅摺痕。最好係梗幕，唔會變形，美國牌子比日本貨仲平，100吋約$13,000。電幕最貴，美國品牌大約$18,000，唔使次次用手拉，畫面平直好多。
逢周五刊出