仲有三個禮拜就七月十四，鬼魂靈異題材可能會幾應景下，自問絕非膽小如鼠，不妨放開懷抱迎接呢隻今日抵埗嘅《死魂曲3》，事關七孔流血嘅麻煩敵人隨處可見，氣氛仲極之恐怖，難度更係集集都高，校靚燈光音響嚟享受佢，打爆機嘅話真係乜牛鬼蛇神都唔使驚。
文：陳福榮
老外視野重新演繹
《Siren:NewTranslation》已經係《死魂曲》系列第三集；開發小組一直好強調，將日式恐怖片嗰種懾人感覺，通過遊戲讓玩家感受；今次則稍作改變，換成外國人視點去睇呢種氣氛同佈局，因此整體架構難免略為國際化。但又唔使擔心佢會冇咗原本嗰種獨特味道，因為多咗簡單直接嘅官能刺激未必係壞事，始終都叫做初次降臨PS3嘛；今次碟內更同時收錄英日語言，唔使擔心睇唔明對白。
羽生蛇村噩夢再現
遊戲舞台回歸番第一集，嗰條幾乎死晒所有人嘅「羽生蛇村」；男主角阿Sam係幾倒楣下嘅大學教授，基於生活艱難為勢所迫，令佢要陪同身為美國電視台記者嘅前妻Melissa，率領工作人員到達遺留住神祕傳說消失村落。點知偶然碰上以活人作祭品嘅儀式，由紅色大海傳來死魂魔音，唔止令條村再次復活起嚟，明明死咗人居然重獲新生，變成殺人不眨眼嘅屍人，令成個採訪團陷入九死一生局面。
幻視看破12章節
今集故事共12章節，每章都以唔同角色觀點，去睇番羽生蛇村點解會再次遍佈屍人；暫知可用人物有7個。《死魂曲》系列有個只此一家嘅設計，就係借助「幻視」嚟窺探其他人或屍人嘅視界；老實講，想單憑人類力量能安然無恙逃避屍人圍攻，簡直係MissionImpossible，所以要靠「幻視」嚟預早知道逃走路線上係咪有屍人徘徊、其他同伴喺邊以至開啓解謎機關等。唔預早Check定所有走佬方法，一旦被敵人發現仲慘過《MetalGear》響警報，事關會引晒成村人出嚟圍剿你，到時想唔死都幾難。
武力未必可逃生
咪以為受紅水影響而變成非人非鬼嘅屍人，好似《Bio》嘅喪屍咁低能任你𡁻，其實佢哋智商僅比人類差些少，但由於唔怕痛兼孔武有力，拎起架生對付你嗰陣就絕對唔嘢少。由於屍人人多勢眾，攻略心得係以保命為主，盡可能避免引起佢哋注意，偷偷地走人好過濫用暴力。然而有啲情況係必須開打，好似同類遊戲嘅中波士咁，想保命最緊要咪俾對方發現，靜悄悄移近屍人背後，喺佢想班馬之前狠狠地將佢收拾，甚至設計令佢跌落無法動彈嘅陷阱都得。
機種：PS3
廠商：SCE
類型：A．AVG
人數：1人
日期：7月24日
