𡃁界名模Angelababy籌備了一年多的寫真集前日推出，昨日她到觀塘2%舉行簽名會，吸引數十名fans排隊，當中不乏男性支持者。但由於塞車關係，Angelababy遲到30分鐘才抵達，至於前Krusty成員張詠恩則以2%公關身份送紀念品給Angelababy。
今年書展，不少女藝人均推出寫真集，問Angelababy會否視身材豐滿的趙碩之為勁敵？她說：「我同佢冇得比，大家身形都唔同，揮低邊個就唔敢講，大家都有唔同人鍾意。」她又表示由出世至今，體重從未超過100磅，故此她最希望成功增磅，平日她已一日吃數餐，但仍然食極唔肥。
男友嫌太瘦
Angelababy坦承希望增磅後上圍升cup，她嘗試過很多方法增大上圍，包括飲木瓜魚湯和搽豐胸產品，但效果並不顯著。至於其男友陳偉霆（William）有否投訴？她說：「唔會，佢只係話我瘦得滯，唔係好健康，佢唔會講啲尷尬嘢。我就最想升到Bcup，啱番個比例，但呢一刻唔會想整大佢囉。」此外，Angelababy早前到台灣拍攝麥當勞廣告，並坐上旋轉木馬拍攝，玩得不亦樂乎。
採訪：駱華齡
攝影：陳志嵐