之前華華提到，喺香港做咗十幾年嘅工銀亞洲（349）董事總經理兼行政總裁朱琦（圖）會調番北京，佢嘅職位會由非執董陳愛平接替，噚日工銀亞洲正式發通告，宣佈陳愛平接替朱琦，任命即時生效，但冇講到朱琦嘅新工作安排。朱琦可以話係中資銀行駐港老總最「長壽」一位，華華唔係話年齡，係講佢駐港時間，如果冇穿冇爛，返京應該可以升官，市場傳聞話會調番母行工商銀行（1398），任北京市分行行長，因為原先擔任呢個位嘅易會滿，5月升做工行副行長。
至於陳愛平今年49歲，有22年銀行經驗，之前做過工行國際業務部總經理，同埋工行盧森堡有限公司主席，02年尾開始出任工銀亞洲非執董，家陣佢仲係廈門國際銀行同工商東亞金融控股董事。
國際業務部不嬲都係工行重要部門，坐得呢個位對仕途晉升好有幫助，好似現任建行（939）行長張建國，都曾經做過工行國際業務部。