號稱香港第一大黨嘅民建聯，雖然黨員過萬人，都未有豪情壯志派人出選全部60個立會議席，一個啱啱成立，講出嚟都應該冇人識嘅新政黨，卻揚言要派出60人參選所有席位，騎呢到爆。
愛國愛港來者不拒
呢個名為社會信託黨嘅新政黨前日發出新聞稿，表示噚日同今日公開招募新黨員，準備參選立法會，八方噚日上門看個究竟。社託黨總部位於北角商廈，門面簡陋，陳設簡單，有個麻甩佬在內，佢自稱係黨主席曾漢文。八方問佢噚日有幾多人報名入黨，佢話有十幾二十人。
曾漢文話歡迎愛國愛港者入黨，只要交100蚊會費就係黨員，來者不拒，入黨後可獲推薦參選。同其他政黨左搖右擺遊花園唔同，該黨政綱單刀直入，「愛國愛港，搞好經濟」。曾漢文聲稱該黨現有30多個黨員，副主席陳海霞，秘書李耀明。
曾漢文自言冇入過其他政黨，亦不曾參選，覺得其他黨派都不得市民信任，倒不如自己組黨從政。曾漢文話自己早年移民加拿大，喺當地做會計，回流多年，𠵱家都有做會計，亦從事貿易，佢話自己有可能出選港島，亦考慮空降九西。