今年醫學界選舉鬥得好激，至少有四個醫生去馬，港大微生物學系副教授何栢良，得到部門阿頭袁國勇同其他教授支持，但係同門嘅助理教授黃世賢卻手指拗出，提名梁家騮。黃世賢話，支持梁家騮係相信佢維護業界權益立場堅定，唔容易俾高層收買。
向來只係會講吓細菌、寄生蟲嘅黃世賢，今次咁激唔跟大隊，反而支持中大畢業嘅騮哥。佢話其他嘢就唔想評論嘞，只係認為一個代表業界嘅議員，一定要好堅決咁爭取業界同前線醫生嘅權益，仲要維護市民利益，喺呢方面佢相信騮哥立場最堅定，從佢往績可以證明到，騮哥唔會側埋醫管局嗰邊。黃世賢又話，立法會入面已經有太多保皇黨，唔希望多一個親中人士入局，咁樣對香港民主發展無益。