染了一頭「𡃁界女神」淺啡頭髮的潮媽徐子淇，果然吸引力大增，她昨日出席夏令營活動，被逾百小兵哥高呼靚女，𠱁得她開心狂笑，難怪她趴地學射槍時，七發有六發飛上天，得一槍中目標。
千億新抱徐子淇，雖然嫁入豪門，榮升母親，但她畢竟只有25歲，仍然好動貪玩。昨日徐子淇與前特首夫人董趙洪娉、唐英年母親唐尤淑圻等，在粉嶺新圍軍營出席第四屆青少年軍事夏令營，與200名中學生同樂。
「好彩叫我姐姐」
染了一頭淺啡頭髮的潮媽徐子淇，甫到場全場中學生小兵哥即時起哄，哇哇叫、尖叫及高呼靚女，又爭相拍照，更叫她早生貴子，𠱁得徐子淇十分開心，笑個不停，她說：「好彩係叫我姐姐，唔係auntie啫！」反轉軍營的徐子淇，有保鑣保護兼負責擔遮斟水，還應記者要求扮敬禮，她說：「唔係第一次嚟軍營，之前都有探訪過，仲一齊唱卡拉OK同食晚飯。」
欲送女兒軍訓
問到喜歡和中學生相處嗎？徐子淇說：「係呀，我哋差唔多年紀，冇乜代溝，小朋友去軍營可以學到團結精神，保持健康。」囡囡李晞彤身嬌肉貴，會否讓她將來入軍營受訓？她說：「都會，小朋友唔好太錫，可以學多啲嘢，如果佢唔係女仔，我都會畀佢亂衝亂撞，作為父母喺身邊保護就夠，唔使太錫。」不怕她粗魯？她說：「開槍唔一定就粗魯。」她又謂稍後囡囡返學，都擔心女兒樣子給人認出。
現場所見，徐子淇十分投入，學開槍射擊時雖然有兩個人伴住，但也都拖延了一會才開槍，她透露之前拍戲有試過，她說：「頭先好驚，開咗7槍，中咗1槍，其他都飛晒上天，我合埋眼乜都睇唔到。」
採訪：RitaLeung
攝影：EdwardChou