內地又公佈富豪榜。今次係《證券市場周刊》做嘅，佢哋呢個周末會推出內地上市民企「2007中國資本市場富豪榜」。
噚日和訊網先行披露十大富豪排名，第一位同上年一樣，繼續係蘇寧電器張近東（圖），個人財富高達351.5億銀人仔，比上年多2.2倍；同前年比更高出3.2倍。
排第2位係新湖創業黃偉，相信香港人未必識；美的電器揸Fit人何享健就排第3。
百大富豪得31入慷慨榜
至於其餘十大富豪中，香港人最熟識嘅係復星國際（656）大股東郭廣昌，佢排第8；而新希望集團嘅劉永好家族，就排第10位。
最搞鬼嘅係，《證券市場周刊》同時做咗個「前100個最慷慨富豪榜」，頭100位富豪中，只得31位富豪同時入到最慷慨富豪榜，唔通真係「孤寒財主」，做得富豪嘅都唔多慷慨？
2007內地富豪榜
第1位 富豪：蘇寧電器張近東（圖）
第2位 富豪：新湖創業黃偉
第3位 富豪：美的電器何享健
第4位 富豪：三一重工梁穩根
第5位 富豪：福耀玻璃曹德旺/陳鳳英
第6位 富豪：泛海建設盧志強
第7位 富豪：宏達劉滄龍
第8位 富豪：復星郭廣昌
第9位 富豪：麗珠集團朱保國
第10位 富豪：新希望劉永好
資料來源：《證券市場周刊》