美股造好帶動港股昨日越升越有，但未知升勢會否持續，嘉賓指恒指接近奧運的一星期可能會上衝23700點至24000點，更可以選擇買入走勢較貼近恒指的龍頭股。
何：荷蘭銀行私人投資產品部董事何啓聰
黃：亨達集團研究部董事黃敏碩
孫：主持孫柏文
孫：今日（周三）市況升得好靚，後市點睇？
黃：我睇後市依然有上升動力，由於美國銀行業業績驚嚇程度無想像中咁大，因此紓緩咗市場短期對美國金融業憂慮；內地方面，中央𠵱家都較着重從穩，更有傳推出一系列令股市止跌嘅政策，如大小非解禁項目需要申報等；喺呢兩個因素配合之下，恒指應有機會重上23700點。
何：恒指今次有機會回補番23700點至24000點之間嘅裂口，喺奧運之前嘅一星期更有機會升破呢啲水位，如果投資者未有貨又想追入，就揀番龍頭股會比較好，因為如果恒指真係要回補裂口嘅話，龍頭股起碼會先跟升，但係如果要追入一啲比較落後嘅股份，相對上風險就比較大。另外，如果想做淡嘅話，可能就要慢慢等喇，始終8月8日奧運開心嘅心情都會令大家唔係咁想沽貨。
孫：仲有邊啲概念嘅股份短期可以炒下？
黃：可能留意個別銀行股同收租股，市況好番啲，佢哋都會有唔錯嘅表現。
何：旅遊股我自己比較睇得淡少少，因為見酒店入入住率都係偏低，反而消費股如百貨、啤酒同食品到奧運嘅時候有可能做得好少少。不過如果投資者無特別心水都係買返個市（指數）算喇。
中海油難上15蚊
李先生:我喺12.95蚊買咗中海油（883），油價升佢又唔升，仲諗住佢會升上15蚊，隻股有無機會升。
黃：兩個月應該上唔到15蚊，因為最近呢兩個星期資金已經緊轉捧中石化（386），因市場都係炒政策因素。
何：只要油價跌得唔急，中海油都會喺11.8蚊有支持。如果油價維持120蚊左右，佢更有機反彈番去你買嘅水平，但係短期上到15蚊可能性就唔大。如果你睇好油價，不如買番同油價有直接關係嘅投資產品。
--荃灣李先生個案--
買入價：12.95元
目標價：15元
止蝕價：-
時期：兩個月
世茂賣樓成績佳
林先生:想喺10.5蚊買世茂房地產（813）？
黃：今日（周三）世茂今日公佈上半年合約銷售，有成40幾億人民幣，增長有近42%，合約銷售面積都增加51.6%，叫做維持住個表現，令世茂今日表現好。
何：內房股盡量揀大隻股，例如中國海外（688），佢個負債比率較低，所以還錢畀銀行唔係佢首要面對嘅問題。其他反而負債比率較高嘅公司，就算銀行唔逼佢還錢，佢哋都要挨好高利率，影響表現。
--九龍塘林先生建議--
建議買入價：10.5元
目前價：12元
止蝕價：-
時期：兩個月
中集運3.3蚊減持
阿葉：之前4.2l蚊買咗中海集運（2866），最近油價回落番，睇吓返唔返到家鄉。
黃：佢喺航運業，競爭比較弱，被動性亦較大，除咗油價外，運力同運費都有個變數。現價2.94蚊，上唔上得番4.2蚊就要睇油價回落係咪真係幫到佢咁多，呢方面我仲稍有保留。但如果佢有機會彈番去3.3蚊，可以考慮減持，或者換馬去中海發展（1138）或中國遠洋（1919）。
何：航運股今次有啲特別，油價已經跌番，但啲航運股今次又唔係好升。反映到大家關注經濟係咪真係放緩，如果經濟真係放緩，佢哋生意都有機會受到影響。
--長沙灣阿葉個案--
買入價：4.21元
目標價：4.21元
止蝕價：-
時期：短期
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股