【佛山直擊】無綫舉行嘅2008香港先生選舉12位參賽者，噚日喺佛山雅居樂花園嘅室內籃球場繼續拍攝外景，少年組同盛年組即場分成兩隊比賽，嘉賓湯盈盈同王君馨喺場邊為兩組打氣。
現場所見，盛年組7號陳世強同9號呂熙都屬於好波之人，但少年組只有1號黃晉業一個人好波，佢仲連入四球，但得佢一個人撐住，所以比較吃力。2號招天佑、4號陳冠標、6號羅天宇同8號何君誠球技都麻麻，其中陳冠標塊面仲慘食波餅，不過好彩冇受傷冇毀容。至於湯盈盈好冧嘅12號朱允崇，雖然打波唔係好叻，不過反應幾敏捷，但比賽途中一度跌倒，好彩同樣冇受傷。結果由盛年組勝出。
姐手姐腳賴胃痛
招天佑唔單止球技麻麻，見佢仲表現到有啲姐手姐腳，佢解釋：「我對籃球麻麻，加上食飽咗，郁唔到同腸胃痛。」對於有報道指佢同個男性友人同居，招天佑話自己都有睇段報道，佢否認報道所講：「我同個男仔只係普通朋友，我以前同媽咪住，不過參賽後就一個人住。」
招天佑坦承曾經跟朋友去基吧見識過，問佢係咪鍾意女仔，佢不知所措咁話：「係呀，我可以點答，WhatcanIsay？」問佢怕唔怕俾人誤會係搞斷背情，佢理直氣壯話：「唔驚！」
