79歲嘅郭老太鄺肖卿噚日首次以新地（016）主席身份露面，出席新地出錢又出力贊助嘅藝術品展覽，一出場就成為焦點，現場嘉賓包括高官、議員、教授同藝術家，好似國際奥林匹克委員會委員霍震霆都湧埋去同佢握手。
問感受封口唔答
郭老太由二仔郭炳江陪伴，全程keep住笑容。上台主持活動揭幕儀式時，仲一手「fing」開扶住佢嘅工作人員。
儀式完咗，郭老太興致勃勃走出室外，喺「大暑」之日欣賞戶外展品。因為場地就喺新地旗下沙田帝都酒店旁嘅空地，一班工作人員不敢怠慢，擔住遮幫郭老太擋太陽，即使嘉賓影大合照，工作人員都搵定個陰涼啲嘅位畀郭老太，咪曬親佢老人家嘛！一眾嘉賓見郭老太唔一齊影相，成班人即刻動身移船就磡。
自從發生兄弟內訌，市場認為，作為大藍籌，有事竟然要老太出山，家族企業色彩太濃喇，所以見郭老太噚日心情咁好，一班記者行家就問佢做主席嘅感受。點知本嚟興致好好嘅郭老太，即時揮手阻止大家發問，仲一粒字都冇回應，有行家話見到郭老太臉色變咗少少㖭。
電郵：mailto:[email protected]
