香港銀行學會慶祝45周年，有「銀行界梁朝偉」之稱嘅會長王冬勝，搵咗特區署理行政長官唐英年做主禮嘉賓，仲有金管局任總，真係忙到同傳媒傾偈都冇時間。到場嘅仲包括工銀亞洲（349）黃遠輝、花旗香港區行長章晟曼、星展銀行葉約德，同埋永隆（096）伍步剛等。
銀行界流動性唔低，今日係主僕，聽日可能變同行。好似06年加盟星展嘅葉約德（Amy），入星展前係金管局助理總裁，當年佢有兩個稱號，一個係「女掌櫃」，一個係「抗鱷英雌」（97金融風暴打大鱷）。噚晚Amy被安排同任總同枱食飯，難得敍舊，但大會唔多通氣，中間隔住大新（2356）王守業。