睇到七月十八日《文匯報》有一個全版廣告，十分醒目，就係宣傳一個「菁英論壇」，主題係「中國改革開放三十年──香港的角色．青年的機遇與責任」，主禮嘉賓有曾特首與高祀仁，可見此論壇十分高規格。香港幾乎日日有論壇，本來冇乜特別，但自稱為「菁英論壇」，由一個「香港菁英會」主辦，此會英文名稱為TheY.ElitesGroup，個Y唔知係乜意思，Elites就係精英們啦，另外又有一個承辦機構叫做「中華青年精英基金會」。
此日啱啱碰到博士C，左丁山同佢講：「既係博士，又係行政總裁，你仲唔係elite？參加菁英會最有資格。」博士C答：「面係人家畀嘅，自己不能稱自己為精英，否則就係自大，譬如我如果做得有成績，又有博士學位，你哋稱讚我係精英，沙塵啲講，我受之無愧。但點可以自己與一班老友走埋一齊，自稱精英呀！」
博士C唔係當今青年菁英，仍有中國文化人謙厚之風；或者到英美名校讀完書返嚟，能講流利英語與普通話嘅，在中環當上高職嘅，就可以當仁不讓，自稱精英啦。記住，只識講英語與廣東話，唔算係精英呀，若然連英語都唔識，喺中環難以立足㖭，除非你已經發咗大達，手下全係當今精英啦。上星期某日到交易廣場四十八樓美國會所吃午飯，中午時分搭𨋢，特別擠擁，𨋢內好多年輕行政人員，佢哋互相交談唔係講英文就係講普通話，點解唔講廣東話嘅？部𨋢停在四十幾樓，好多年輕人走咗出去，左丁山伸頭一望，乃係一間投資銀行寫字樓，精英集中營也。
上到美國會，碰到總裁B，佢講起佢位公子在美國長春藤名校考完博士資格試及格，可以開始寫博士論文，本來十分開心，點知兒子回港放暑假，見番班同學精英在投資銀行工作者，年薪已過百幾萬，有幾位仲揸波子返工㖭，總裁B兒子講：「寫博士論文，最快兩年，慢則三四年，攞到博士學位又點？我決定留港做工，唔返美國咯。」總裁B為之冇符，叫左丁山幫手勸吓。左丁山點識勸吖，請佢搵博士C傾吓至真！