「投資咪做羊生羊太，要事先問清楚保障自己」，證監會熱播多年嘅廣告都算深入民心，今日佢哋推出全新一輯投資者教育短片，會喺全港1600架巴士播放，每條片約長15至20秒，全輯共18個主題，喺9月30日前分階段上演，大概每3日換一套新片。
華華登上證監會網頁先睹為快，短片係就係實用性好高，提醒散戶買新股唔係包賺、買末日輪隨時變廢紙、經紀行有權斬孖展倉，聽股評人意見時，亦要留意自己嘅風險承受能力……之不過散戶記唔記得又係另一回事。呢啲內容每日電視電台財經節目都有講，但點解仲係咁多散戶中招先？
證監今次嘅廣告唔多突出，一嚟冇明星賣點；二嚟冇學者好權威咁講乜嘢唔好；三嚟又冇容易入腦嘅抵死對白同歌詞，乘客除咗記得「證監會提提你」呢6個字，唔知仲會記得幾多嘢呢？