林敏驄和陳伶俐於98年結婚，二人育有兩子，早前女方被傳有婚外情，阿驄力撐陳伶俐之餘，兩人不時一起現身晒恩愛。但日前卻傳出二人已分居三年，備受婚變傳聞困擾的阿驄，前晚在talk騷上首度開腔直認已離婚，但強調婚變不涉及第三者，又大讚前妻有情有義，故他們離婚後仍維持好友關係。
林敏驄和曾志偉前晚在九龍灣StarHall演出尾場「棟溝笑2008」，圈中好友譚詠麟、陳小春及女友應采兒等均有捧場。阿驄在完騷前向觀眾真情剖白，直認與陳伶俐已離婚。他在台上認真地說：「今年好多風風雨雨，對我嚟講係奇怪嘅一年，我同以前嘅太太（陳伶俐）係分開咗一段時間，喺呢個時間講係唔想傳媒再煲再吹，喺呢件事上啲人問我點解企出嚟撐，呢啲係男人起碼嘅風度。我認識嘅陳伶俐唔係咁嘅人。」他的說話獲全場拍掌支持。
「仍會做好朋友」
在旁的志偉搭嘴說：「其實阿驄咁樣唔容易，佢都好難過，雖然好多人喺演唱會講結婚，但佢就講離婚，不過真事唔怕人知。」阿驄堅稱與陳伶俐再見仍是朋友，他說：「雖然我哋分開咗，但仍會做好朋友，同盡父母嘅本份，呢個係我嘅承諾。」
事後在慶功宴上問阿驄公開離婚一事後會否感到較輕鬆時，他說：「係，辛苦咗幾個月，終於講咗出嚟，聽老爺（曾志偉）話講出嚟。」問到他在台上剖白時是否想喊？他說：「只係氣氛燈光營造效果。」志偉卻踢爆說：「係就係，喺度『絲絲索索』。」
再問阿驄和陳伶俐是否如傳聞所言已分開三年？他說：「分開咗一段時間，嗰時未做好手續，嗰時有啲唔好新聞，作為前夫、朋友乜嘢都好，梗係出嚟撐。佢之後同邊個唔關我事，陳伶俐係一個有情有義嘅人，以往我有啲乜事佢都會挺身出嚟撐我。做夫妻係緣份好深，係上天安排，我仍然會祝福對方。」
一周見子一次
阿驄又否認婚姻失敗涉及第三者，他表示兩個兒子需要時間適應父母婚變，一星期會跟囝囝見一次面，至於兒子的贍養費問題，阿驄就不願透露。
此外，志偉因做騷未能到不丹出席好友劉嘉玲的婚禮，他說：「我都搵唔到佢，但搵咗不丹王子搭嘴，佢哋嘅婚紗相好靚。」提到嘉玲的大肚傳聞，志偉說：「應該唔係。」
採訪：駱華齡
攝影：陳志嵐
