雖然四川大地震不經不覺已經過咗兩個幾月，但香港市民仍然冇遺忘一班地震災民，港交所（388）噚日就再增撥捐款500萬銀，支持地震災區重建，呢筆捐款會直接捐去由政府成立嘅「支援四川地震災區重建工作信託基金」，呢個信託基金主要係接受及轉發政府嘅四川災區撥款，同埋公眾捐款，支援地震後嘅重建工作。
港交所早喺5月12日發生四川大地震之後三日，已經捐出500萬銀，今次增撥捐款，主要用嚟災後重建，亦鼓勵員工自行向信託基金捐款。除咗港交所增撥捐款，早兩個禮拜，馬會更大手筆再捐10億銀，協助災後重建，你話港人幾咁樂善好施。