帶阿媽掃貨慳得就慳
馮仁昭四圍超：熊黛林母女即食麵醫肚 - 馮仁昭

南京名模熊黛林年前同郭富城傳緋聞之後，憑天王情人稱號火速冒起，短短三兩年已經搵埋唔少，不過佢一啲都唔大花筒，就算近日熊媽媽來港，熊黛林依然貫徹慳妹本色，同媽咪返屋企食即食麵。
早幾日熊黛林一收工，就帶媽咪去中環ifc嘅EsteeLauder掃化妝品，相信品牌有贊助，所以女店員自動幫佢執咗一袋護膚品同化妝品，之後熊黛林拎住戰利品，同媽咪手拖手行去隔籬嘅~H2O+，但齋睇齋問冇幫襯，跟住兩母女行去攞車。

主動介紹

熊黛林當日揸咗傳聞城城相贈、價值26萬嘅黑色MiniCooper代步，載住媽咪去大坑屋企附近嘅一間寵物店，繼續齋問唔買，佢離開時仲同記者介紹話：「呢個係我媽咪，帶佢周圍行吓街，行一陣買少少嘢就返屋企。」繼而佢哋去附近嘅惠康超市掃貨，熊黛林負責推車仔，買咗些少菜類、水果、半打蒸餾水、幾盒撈麵同即食麵就返歸。
熊媽媽同乖女留喺屋企食即食麵醫肚，唔止毫不介意，架車臨駛入屋時，仲主動落車幫個女開大廈鐵閘，有個咁體貼嘅媽咪，熊黛林有福啦。