年頭新款Mazda6到港時，對呢架SportsSedan冇咩感覺，係尾燈靚咗，唔再似兩條荷蘭豆。今次同佢相處一星期，先發覺原來佢好啱我；放工一上車開音響，8個BOSE靚聲喇叭安撫我忙碌心情；放假見班損友，170匹馬力配5前速加減波亦冇丟我架；到噚日見家長，連出名難服侍嘅阿爸阿媽都話佢外表大方，唔拋唔Dun坐落好穩定。最估唔到係軚盤上嘅加減波按鈕，用慣咗發覺好順手，原來一隻手玩得晒5個波係咁過癮！
文：嘴嚼爺
攝影：林栢鈞
協力：徐影龍
Model：Joanne
同我身邊損友們做過統計，唔理幾多個加減波，對得多都會有厭嘅一日，熱情不再，到時咪又係一個D波走天涯。不過咁，今次我玩足一星期都未厭，同級車中，得日產Cefiro有加減，但都係4前速，Mazda6套拍住同廠跑車RX-8嘅5前速就真係殺晒。
日日返工行環保大道需索好大，見到泥頭車又忍唔住加速爬頭，又上斜又落斜又整路Cut嚟Cut去，啪低一粒兩粒波過彎加速真係話有就有，而且最重要係軚盤兩邊都設有加減掣，指公落波食指轉高波，單手已經玩晒，唔使下下用晒雙手落場劈咁。
見家長冇投訴
試咗幾日，我都有信心帶佢見我阿爸阿媽，星期日就過土瓜灣行一轉。須知道老人家懶理性能有幾勁，但坐車總會腌尖腥悶，嫌快又嫌慢，避震硬少少又話Dun，試坐啫，揀新抱咩？
上到車，阿爸坐前頭，電動座椅校前校後好方便吖，仲多手開個天窗，鍾意光猛喎。阿媽坐後座，淨係拋低咗句：「幾闊落。」土瓜灣出發，燈位多開開停停，轉檔順暢避震唔硬，冇投訴；經東隧東廊，開快些少，阿爸瞄到速度錶，「作死呀開咁快，不過又唔覺唔覺，好定喎。」我唔係有心，踩踩下就到限速，真係幾定幾靜。到柴灣，專登挑戰柴灣道大斜路，啪低兩個波踩盡啲，夠力，好快拋離隔籬架舊款Camry同兩架小巴。
唔捨得24萬
安全到埗，放低兩位老人家，冇乜做就約Joanne飆入荃灣遊車河兼影相，後生女又點睇呢？連Mazda都未識串嘅Joanne就話架車幾有跑Feel，上到車就一輪嘴：「嘩，個錶板好靚呀！你自己改㗎？唔似日本車喎！」仲一嘢插部iPod落套音響度扭到鬼咁大聲。係，套BOSE好靚聲，但都要顧吓我感受㗎！
揸咗咁多日，結論24萬係幾抵，亦跟上潮流有歐洲車系嘅豪華感，最重要舒適得嚟性能幾好，而呢幾日對得最多嘅錶板，更加係我嘅至愛，嫌我長氣都要讚多次，我真係有啲唔捨得送佢返車行呀。
規格
引擎：2,488c.c.MZRS-VT引擎
馬力：170hp/6,000rpm
扭力：23kgm/4,000rpm
傳動：5前速+/-自動波
尺碼：4,755×1,795×1,440mm
查詢：萬事得汽車（28931112）