陳鍵鋒噚日喺藍田拍攝劇集《王老虎搶親》嘅跳崖戲，雖然天氣好熱，不過陳鍵鋒話唔使以女裝上陣，加上現場不時傳來陣陣凉風，已經覺得「好彩」，佢話：「今次得一件古裝衫已經好好，前幾日拍反串女裝戲咪仲辛苦，大熱天時拍咗幾個鐘頭戲，熱到啲眼睫毛又甩晒，個妝又曬到溶晒，真係好難頂，所以我都好佩服啲女仔，大熱天時都要化妝出街。」