同仁堂科技（8069）噚日傍晚時分發出通告，公司副董事長兼執行董事張生瑜（圖，黑圈）凌晨喺屋企因突發心臟病去世，享年38歲，英年早逝令人惋惜。
其實張生瑜病逝嘅消息，噚日一早已經喺內地網站流傳，但係得唔到北京同仁堂證實。據內地《金融界》網站報道，佢哋透過張董生前嘅手機，接觸佢嘅屋企人，先至確認消息真確。
剛逝世嘅張生瑜擁有大學學位，做過經濟師，喺同仁堂工作多年，先後擔任過同仁堂集團管理處副處長、計劃處副處長，同仁堂股份證券部主任、董事會秘書同副董事長等職位，離世前係同仁堂股份董事長，同埋同仁堂健康藥業副董事長。