英超球會韋斯咸周日上演北美行首場賽事，結果輕鬆以3:1擊敗美職球隊哥倫布機員隊。只可惜半場時雙方球迷發生衝突，唔單止令呢場表演賽失色，亦都搞到領隊古比士利好尷尬。
話說上半場，韋斯咸憑艾殊頓同對方嘅烏龍波，領先2:1；一小班韋咸球迷可能覺得睇本地波俾人睇到實，於是趁半場休息繞住看台行大運，順便睇真啲個球場；結果唔覺意誤闖哥倫布機員球迷嘅地頭，雙方經一輪眼神交戰後，開始嘴藐藐、眼超超……
誤闖敵陣遭「問候」
哥倫布球迷向來係美職聯嘅麻煩球隊，月前仲因辱罵新英倫革命黑人前鋒基利杜比，受到有關方面調查。呢班地頭蟲一開始就問候對方母親，而對英文特別有親切感嘅30多名韋咸球迷，喺英超咩場面未見過，又點會被嚇窒呢？於是隨即擺出「雁行陣」，攻向100多名主隊球迷度。
一時間，東北看台淪為肉搏戰場，幾名赤膊紋身嘅韋咸球迷拳拳到肉。正當主隊球迷恃人數優勢漸漸扭轉敗局之際，球場保安同警察介入，分開雙方球迷，大家繼續坐定定等睇波。據講，警方喺球場外拘捕一鬧事球迷，至於場內有冇「俘虜」就未有公佈。
轉戰芝加哥鬥全明星
下半場開番波，韋咸憑基爾列特再下一城，奠定3:1勝局。領隊古比士利賽後讚比賽好刺激，「我哋選擇同美職聯球隊交手，係要畀呢度球迷知道韋咸嘅威力！」咁又係，美職聯好少發生球迷衝突，今次都算係突擊演習，美國警方真係要多謝韋咸啦！
韋咸之後將轉赴芝加哥，準備周四對由碧咸助陣、前利物浦名將尼高率領嘅美職聯明星隊，據講明星隊對上4次對外隊全勝，唔知古比士利呢次可唔可以打破宿命呢？