聽春天高講劉雅麗演《蔓珠莎華》、歐錦棠演《死佬日記》，講到歌后多悲慘，不禁神傷。周璇自殺、鄧麗君死於服藥過量、梅艷芳死於子宮癌，皆屬英年早逝型。次日連忙上網尋找EdithPiaf嘅一生資料，一睇，唉，苦過金葉菊，幾乎慘過梁天來。
Piaf生於一九一五年，原名EdithGiovannaGassion，死於一九六三年，享年四十八歲。歌后在巴黎出生，父母靠街頭表演搵食，兒童時代生活貧窮，經常生病，幾乎盲咗，懂事後就在街頭賣唱，後來被發掘到巡迴表演團唱歌，取藝名Piaf，越唱越紅，一九三六年二十一歲開始灌唱片，此後一路紅到戰後，紅遍大西洋兩岸，成為法國流行歌后，但佢拍拖幾次，皆無結果，一九四九年佢嘅男友遇上飛機失事死亡，到咗一九五一年（三十六歲）就開始無酒不歡，吸嗎啡，捱到一九六三年逝世，同梅艷芳一生有甚多相似地方。莫非真係天妒紅顏？
劉雅麗在《蔓珠莎華》唱足三十二首歌，有人問佢同梅艷芳熟唔熟！劉雅麗話大家係識嘅，間中有來往，佢媽咪同阿梅仲更加熟啲。佢話阿梅一生追求真愛而不可得，身邊朋友雖多，無一可託終身，只能鎮夜拉着相識、劈酒大吃大喝，以掩心靈寂寥。最可嘆者，乃係知道患上子宮癌後，不肯接受手術切除，心裏仍抱一絲希望，他日能誕下兒女！
阿梅當然不知道，死後仍有阿媽打官司爭遺產。左丁山在家翻看梅艷芳最後一個演唱會嘅影碟，睇睇吓有啲心寒，佢身穿白長裙，步上舞台長梯，回首與觀眾拜拜，神色（當時不知）似有必死決心，抱重病在紅館演出，非求死為何？睇影碟，參考聽回來之故事，實在不忍，熄機長嘆。
社長M話一定要入場聽劉雅麗嘅《蔓珠莎華》，重溫梅艷芳金曲，至於是否會聽到悲從中來，仍然未知。左丁山同意之至，有衝動想買一啲Piaf嘅唱片，聽吓佢嘅法文歌及英文版本，不過年代久遠，不知何處有貨，要畀啲時間去慢慢搵。