【本報訊】一名倒楣的士司機昨凌晨在尖沙嘴接載一對滿身酒氣男女乘客往太子途中，駛經油麻地時男乘客作嘔，着司機停車，但女乘客惡言催促司機開車，雙方因而爭吵。混亂中司機遭襲擊，他落車逃跑時仆倒受傷。一名男途人扮好心幫助司機報警，趁機取走他的手機不知所終。
記者：黃江奇
該名倒楣的士司機姓郭（50餘歲），昨凌晨4時許駕駛的士在漆咸道南接載兩名滿身酒氣男女往太子。當的士駛至彌敦道近眾坊街時，男乘客疑酒後不適想嘔吐，着司機停車。的士停定後，男乘客打開車門，但嘔不出，女乘客疑不耐煩，態度惡劣催促司機開車。
「我怕開車後個男人真係嘔到一車都係，同個女人講：『想嘔就嘔咗先囉，講嘢唔使咁惡嘅！」點知個女人就發惡，鬧我同打我幾拳，我同佢嘈，跟住個男人幫手打埋我囉！」郭遇襲後落車逃走，但被惡男女尾隨追打，結果逃跑時仆倒，手部擦損。
惡男女見他仆倒後逃走，郭企圖追捕但氣喘，有心無力，在腰間取出手機欲報警時，一名男途人扮好心主動提出協助。
受輕傷不追究
「個男人見我揸住部手機，喘緊氣未打到電話，主動話用我部手機幫我報警。佢真係同我報警叫差人到場，收線後話幫我追嗰兩個男女，跟住就攞住我部2,000蚊嘅手機追咗去，點知一去無回頭，俾佢呃咗部手機囉！」郭憶述被騙經過時一臉無奈。郭受輕傷，接受救護員檢查後拒絕入院，又以趕交更為理由向警員講述案發經過後，表示不追究便匆匆開車離去。
的士司機倒楣事件示意圖
