袁詠儀（靚靚）噚日同葉翠翠、曹敏莉、田蕊妮一班無綫劇集《疑情別戀》藝員，喺長沙灣出席宣傳活動，佢哋同觀眾玩遊戲兼大派海報。靚靚啱啱喺橫店拍劇返港，因為天氣熱加上太辛苦，所以瘦咗好多，靚靚話辛苦搵錢只係唔想坐食山崩。
「佢問我係咪唔開心」
雖然靚靚忙搵奶粉錢，但最近有報道話佢老公張智霖（Chilam）同阿媽聯名買咗灣仔豪宅尚翹峰，竟然冇預靚靚嗰份。靚靚解釋問題係出自佢同Chilam冇開聯名公司，但係Chilam同佢媽咪就有開，靚靚話：「有個經紀call佢（Chilam）話有個筍盤，佢就好似買菜咁就買咗，之後Chilam有問過我係咪唔開心，係就不如轉名，仲問埋律師啲手續㖭，計過轉名要使幾十萬，咁多錢畀我好過啦！我有問過佢係咪唔信我，Chilam只係答：『你話呢！』經過呢件事，如果再置業，我哋會聯名。」
靚靚又話：「我哋喺屋企各有崗位，屋租Chilam負責畀，雜費我畀，Chilam想有一個穩定嘅家，我提供一個舒服安樂窩，佢打開雪櫃想食乜都有，佢想開冷氣就開，有搵錢能力都應該為呢個家付出，男人盡番應有嘅責任，做夫妻呃呃𠱁𠱁就一世。」
