我求大俠經常拜讀金庸先生嘅作品，而喺《倚天屠龍記》入面，「金毛獅王」謝遜因為報仇而得罪咗武林中人，最後仲同張翠山、殷素素流落到冰火島，身世可以話非常坎坷。誰不知現今球壇嘅「金毛獅王」沙維亞一樣咁慘，諗住去到洛杉磯銀河可以安樂咁過埋剩低幾年，點知教練古列治一樣冇面畀，仲請佢食「無情雞」㖭！
搵阿根廷後衞補位
各位球迷喺星期日早咗起身嘅話，扭開電視都睇到紐約紅牛主場對洛杉磯銀河呢場波，不過奇就奇在點解沙維亞連大軍名單都冇嘅？我求大俠就睇返啲消息，原來沙維亞喺對紅牛呢場波之前俾銀河炒咗魷，原因就係嚟自阿根廷甲組聯賽颶風隊嘅後衞杜明基斯啱啱拎到簽證，嚟緊可以為銀河上陣。啲消息仲話，教練古列治已經叫杜明基斯同球隊操練咗一個禮拜，等簽證一搞掂就可以同沙維亞解約，直頭係有晒部署個隻，呢隻「無情雞」認真唔易啃囉！
沙維亞俾人踢走咗之後，銀河主席拉拿斯就出嚟循例講返啲客氣說話，佢就話又話沙維亞走咗好可惜，又話祝佢之後嘅事業可以成功，真係假到暈！
身世似《倚天》金毛獅王
計我求大俠話，沙維亞呢個「金毛獅王」嘅身世真係同謝遜一樣咁慘。話哂沙維亞當年都係堂堂葡萄牙正選國腳，但係呢幾年又因為吸毒搞到坐波監，連米杜士堡都唔要佢。上季嚟到洛杉磯銀河諗住做吓山寨王，仲有得同「萬人迷」碧咸拍硬檔一齊上，點知𠵱家連美職聯都唔侵佢玩，真係冇陰功！
沙維亞做咗失業大軍，成35歲要再搵班落都唔係容易，咁不如嚟香港兜番轉碰吓運氣，話唔定羅生覺得啱用，搵佢上「少林寺」都唔奇㗎！