煲呔呢期民望跌得犀利過股市，呢頭拆解完副局長個政治炸彈，又要推出紓困措施補鑊。唔知係咪因為有太多煩惱搞到睡眠不足，煲呔噚日喺黑龍江參觀哈爾濱工業大學時，竟然喺眾目睽睽下瞌眼瞓，仲要身邊嘅女人即係阿曾太提點，先肯同周公講byebye，擘番大對眼繼續撐落去。不過，事後特首辦矢口否認煲呔瞌眼瞓，堅稱佢當時只係低頭沉思咋喎。
晨早去望彌撒
八方唔喺現場，但明明喺電視新聞片段睇到煲呔對眼慢慢合埋，然後個頭微微舂咗一下，完全feel到佢嘅睡意。究竟煲呔點解咁攰？當然佢自己先知，但呢幾日喺東北三省風塵僕僕，其實都幾易用晒啲精力。據知佢前日搭咗幾個鐘頭飛機後，已經有啲舟車勞頓後遺症，但夜晚仍然要同省領導人晚宴，席間難免又要飲番兩杯吹吹水，上得床嚟都已經時候唔早。
本來噚日官方正式活動都唔算太早，但由於係星期日，身為天主教徒嘅煲呔，自然幾攰都要去聖堂參與彌撒。據知佢同太太曾鮑笑薇5點幾已經起身梳洗，搭正6點就已經上車，去當地一間小教堂祈禱。
唔知係咪因為瞓得少啦，據聞煲呔成個朝早都有疲態，去到哈爾濱工業大學參觀，睇機械人表演嗰陣仲好哋哋，估唔到轉過頭就開始頂唔住睡魔急call，聽聽吓人哋介紹科技產品時竟然公然瞌一瞌。好彩坐喺佢身邊嘅曾太夠醒目，即時提點佢，先至冇出現流口水兼打鼻鼾呢啲失禮死人嘅場面。
特首辦發言人就同八方解釋，話煲呔當時只不過係合埋咗對眼，有一段時間喺度低頭沉思啫，唔係瞓着覺。咁嘅解釋，擺明係繼新解「親疏有別」後，再次挑戰市民常識。不過，特首辦方面都承認，呢次訪問行程確實緊密，唔知係咪想暗示煲呔閉目養神都唔係好過份啫？好多高官不時喺立法會會議廳都俾人影到瞇晒眼瞓覺嘅情景，唔通佢哋其實都係沉思緊？
可能係知道已出洋相，據聞煲呔喺其後嘅參觀行程都打醒十二分精神，冇再展現朝早嗰種攰樣。其實煲呔呢一程訪問去到26號先至完結，睇嚟佢都要諗計仔，有咩辦法可以提吓神捱眼瞓；否則再繼續「沉思」落下，民望隨時繼續「沉」。
mailto:[email protected]