辛苦搵嚟志在食，星期日，有乜好過揸住架豐田Picnic精裝版，遊車河享天倫食番餐勁？叫你揸車去乜商場物商場食乜菜物菜，實俾你柴台。是日推介一條Route揸到山旮旯咁遠，喫齊早午晚，有咁僻食到咁僻，包你捧住個肚走。
記者：王震遠
攝影：陳陶鈞
模特兒：嘉俊、嘉寶、嘉瑤；Matthew、Roxanne＠StageModels
晨早
舊式點心，極罕！
晨早流流要醫肚，中國人梗係飲啖茶食個包啦。第一站推介「逢吉茶樓」嘆一盅兩件，舊式茶寮風味，絕非市區集團式茶樓可比，裝修樸素遠離煩囂，坐得舒服慢慢Hea，係山長水遠㗎嘞，但可以食到非一般點心，仲要每碟十蚊八蚊有交易，呢份驚喜，夠數啦。
（元朗逢吉鄉2號/24711791）
出籠大包（後）$8，唔亁身水份夠，豬雞蝦火腿等餡料鎖到肉汁；麻茸包（中右）$4、蓮茸包（中左）$4、奶皇包兩個$4，鬆軟表皮一㩒曉彈番上嚟，熱辣辣超正。
鵪鶉蛋燒賣（前）買少見少，鵪鶉蛋入口滑嘟嘟，必試；豬肚燒賣（中），豬肚好彈牙；亁蒸燒賣唔會蒸到亁晒身，要讚。各$8
大大隻糯米雞$15，有雞肉、火腿、燒肉、豬肚等餡料，糯米粒粒煙韌，唔會腍到爛，全因蒸足40分鐘先出籠，呢份堅持，家陣啲酒樓No啦。
揸車
大欖隧道入青朗公路，於博愛交滙處靠左轉入新田、上水方向，進入青山公路潭尾段，經過沙浦留意逢吉鄉指示牌。
泊車
茶樓有自家空地，可容納十多部車。
中午
正宗圍村盆菜，起筷！
飲完早茶遊車河，四個轆繼續周圍飛，中午不妨去「八鄉古廟」求番支籤，搵老闆曾先生吹水，「八鄉古廟盆菜最正宗，正宗圍村盆菜邊會有鮑魚？啲快餐店加乜加物，根本就係拼盤。」而原名皇帝狗仔鴨嘅萬里香皇帝鴨，係盆菜必備餡料，萬里香即係狗肉，相傳亁隆皇下江南想試狗肉滋味，可惜太監千方百計都搵唔到狗，最後焗住同御廚夾計欺君，燜鴨肉當狗肉瞞天過海，點知真係過到骨，亁隆大讚好味，呢味菜式自此流傳民間。
（元朗八鄉上村87號/24883417）
正宗家鄉盆菜6至8位用細盆$538，12位用大盆$808（下圖），餡料豐富，大嚿肥豬肉，肥膏入口即溶，撈埋秘製醬汁好正；皇帝鴨燜得香，肉質唔韌；鋪面一層茄汁大蝦，鮮甜彈牙；最底層嘅枝竹、豬皮蘿蔔吸收菜汁精華，唔試走寶。須預訂。
揸車
青山公路潭尾段往元朗方向，至博愛交滙處左轉入青山公路元朗段，至凹頭迴旋處靠左，於錦田公路及林錦公路迴旋處靠左再轉入錦田公路，路旁有八鄉古廟指示牌。
泊車
廟前空地可容納30部車。
入黑
古法煮海鮮，必試！
吹完水，Say個Bye上番車，沿路去白泥睇日落影靚相，不過我黑，影相嗰日忽然大雨，但信我，白泥位於香港西面，睇鹹蛋黃份外大粒。影完靚相，爹娘有爹娘吹風，仔女可以落泥灘摸蜆捉蠔。入黑，又係時候喫晚飯，白泥附近就係流浮山，流浮山「明記酒家」海鮮出晒名，師傅曾經任職酒店，廚藝功夫絕對係大師級，上閣樓開飯，食到飽先揸番車返屋企，呢Day過得充實嘞啩？
（流浮山正大街40號/24721408）
古法燜魚$200，去魚鱗上生粉直接脆炸，加蠔油燜，打多個芡搞掂上碟。魚腩鮮味十足，肉質滑嫩夠多汁，十個正。
豉油皇大蝦例牌$150，生抽醃大蝦，放入猛油炸到金黃色，加蒜香上碟。豉油味無搶過蝦鮮味，色香味俱全咪就係咁囉。
碧綠海皇藏珍寶$230，呢道係懷舊菜，斑塊、鮮蝦仁、鮮菇粒、西芹粒釀入冬瓜蒸廿分鐘，冬瓜消暑，蝦仁大隻，斑塊好甜，菇粒同西芹爽。須預訂。
揸車
錦田公路往元朗方向至博愛交匯處，按指示牌入天水圍北及流浮山，經天華路左轉入流浮山道迴旋處即到。
泊車
明記酒家所屬亨發停車場，先付款（平日每小時$10，周末及假日全日$25），攞番張食肆免費停車卡，幫襯酒家可以換番錢。
家庭車好使好用
「我哋開開心心玩番日好唔好呀?」三隻化骨龍拖長尾音，嗲到父母心都軟埋，邊有得揀呀，即刻揸呢部豐田Picnic精裝版出發。上車，先輸入地方名或地點電話，SG+導航/娛樂系統即用內置速度感應器（SpeedSensor）同陀螺儀（GyroSensor）定位，就算喺石屎森林都唔受干擾，怕只怕行錯路，接受唔到衞星信號幫助重新定位啫。
由天后直踩入錦田飲早茶，大長途三隻化骨龍乘機唞一唞，「呼?」鼻鼾聲響起，都怪中、後排皮椅太過闊落舒服，化骨龍瞓到扯晒鼻鼾。
豐田Picnic操控簡單容易，男女都舞得掂，三排座椅活動性強，載人載貨夠實用，長途車最啱放個冰箱，儲定飲品俾小朋友隨時飲，好方便。講真，呢部車性能馬力唔算超勁，起步加速反應慢，不過咁，家庭車要咁大馬力把鬼咩？夠力好坐夠舒服咪得囉，係咪咁講先？
揸車
亨發停車場轉右，沿深灣路直行5分鐘，即見上、下白泥指示牌。
規格
引擎：1,998c.c.直4VVT-i
馬力：163ps/5,000rpm
扭力：19.6Kgm/4,000rpm
傳動：四前速自動波
查詢：皇冠汽車（28661020）