通脹越嚟越勁，搞到近排唔敢亂買嘢，見到鍾意嘅衫褲鞋襪已經買少咗，連護膚化妝品都要慳住用，最慘連小妹最鍾意食嘅出前一丁，都加到$4.4一包。
不過，上星期小妹跟班朋友上深圳揼骨之後，先知道嗰度仲係購物天堂！點解咁講，首先係因為我只係用咗百幾二百蚊就可以享受到推拿按腳修眉等貴賓式服務，之後去超級市場行街，仲俾我發現唔少嘢平過香港㖭！
最開心係，深圳吉之島賣嘅出前一丁，平到¥2.4一包，計番港紙都係$3多少少，平咗個幾，我當然即刻掃番幾包返香港啦！此外，高露潔牙刷最普通嗰隻款式都係¥1.9元一支，比起香港平均要$7、$8一支平好多，我哋一行四人唔執輸，每人掃咗成打！仲有¥20都唔使嘅冲凉大浴巾，同埋喺香港要賣成$40、$50七片裝嘅面膜，嗰度都係賣¥10三片。
買咗咁多嘢，埋單都係¥100左右，雖然我唔係經常返深圳玩，但若果每個月去一次補倉掃貨食嘢玩吓，計落條數其實都有賺！
逢周六、周日刊出
電郵：mailto:[email protected]