不時踢爆政府行政失當嘅申訴專員戴婉瑩明年3月底約滿，呢位女版包青天決定唔再續約，另創新天地。政府近日登報請下任申訴專員，但學歷條件一欄竟然冇寫明要求大學或以上學歷之類，只須良好教育水平、聽講同書寫中英文俱佳就可以申請。
八方𢱑爆頭，話晒申訴專員屬首長級D8位，相等於常任秘書長級數，月薪超過廿萬，另加房屋、牙科、假期同度假旅費等福利津貼，仲有約滿酬金，但咁高層嘅職位，竟然好似廣播處長早前招聘咁，唔使應徵者有至少大學學歷，唔通又係要為某某人選度身訂做？
變相降格
立法會議員李卓人亦話，申訴專員咁高職級嘅人員冇可能唔使大學或以上學歷，政府咁搞法變相係將視為眼中釘嘅申訴專員降格，「如果將來嘅專員冇大學學位，學歷同政府班高官就對唔到口，變相貶低專員地位。」
另一議員張文光亦感到奇怪，佢話好少政府高薪人員招聘會對學歷冇具體嘅要求，但佢就認為唔使過份擔憂，因為佢相信始終都會有班高學歷嘅人士申請呢個位嘅。