國家副主席習近平月初嚟香港，叫煲呔要同各界溝通，點知煲呔當耳邊風，上個禮拜立法會擺散會晚宴，煲呔帶埋兩個司長一齊出席，但飲咗兩杯就一齊鬆人，班議員都知道佢要去有「煲呔針」之稱嘅大班壽宴，連餞別范太同九位唔再連任嘅議員都唔畀面。
八方聽聞，煲呔嗰晚帶埋兩個司長，約7點幾就趕到香港仔鄉村俱樂部。電盈老闆小小超同艾維朗喺門口迎接，原來呢餐係小小超賀大班生日嘅豪門宴，筵開六席，紅酒佳餚每圍要幾萬蚊找數。當晚煲呔、大班同小小超坐主家席，兩個司長就只有同煲呔最「親」嘅鬍鬚曾坐主家席，唐唐要坐另一席。出席嘅城中名人仲包括李國寶兄弟、單仲偕都係座上客，大家玩到10點幾先散席。