暫時無足球節目可看，奧運又未到，星期六日晚上於是頗為得閒，有時間上網睇吓BBC嘅足球八卦欄（GossipColumn）。話說曼城俾前泰國總理他信買咗之後，大灑金錢，去季以高薪聘請名牌領隊艾歷臣做球會領隊，年薪好似係三百萬鎊，所以艾歷臣去到曼城之後，唔租屋住，而係住在一間五星酒店嘅套房，日租一千五百鎊，計埋稅與貼士，一個月嘅租金當在五萬鎊以上，等於一個英國會計師嘅年薪。好嘞，住酒店有度好，可以隨時鬆人。果然曼城戰績雖然大躍進，老闆他信仍然唔滿意，球季完畢立即踢走艾歷臣，賠償幾百萬鎊亦不吝嗇，益咗艾歷臣向英足總伸手之後，又攞多一次解約賠償，施施然去咗墨西哥做國家隊教練，只要佢唔亂咁使錢，又唔搵多幾個情婦嘅話，退休生活已有保障。
大富豪有錢鍾意浪費，他人冇理由阻止佢啫。他信請咗布力般流浪嘅曉士做曼城領隊，但好球員唔見得有幾多個，於是又傳出以三千五百萬鎊搶朗拿甸奴，但細哨唔吼中型班，更喜愛生活多姿多采嘅米蘭市，以低三分一嘅轉會費轉到AC米蘭。曉士憑邊啲球員為曼城爭取更好戰績，挑戰四大豪門與愛華頓，布力般，維拉呀？木宰羊。不過他信係泰國人，唔知係唔係請教咗白龍王或得道高僧，在曼城球場大搞風水，近日在球場及接待地方埋下幸運水晶，在球會寫字樓及紀念品零售店內擺放「幸運樹」，三腳蟾蜍與佛像，希望球季開始後，能為曼城帶來順風順水，對方射門中柱，己隊射門撞柱入。
他信闖英倫，故事多多，提供大把資料畀陶傑寫亞洲與英國之文化異同。左丁山睇完呢啲八卦，幾乎想託泰國賓架Ｒ介紹紫微楊畀他信，等紫微楊到曼城球場睇風水睇真啲。曼城領隊MarkHughes係強悍威爾斯人，性格硬朗，最注重紀律與鬥志，唔識風水，佢與他信見面之時，唔知會否「識相」呢？他信講完，佢敢唔敢講一句「Ibegtodisagree」？英超聯開鑼後，左丁山好有興趣睇吓曼城踢成點，如果連輸幾場嘅話，他信可能夠膽請白龍王去坐鎮，親自作法㗎，等班英國佬領教吓亞洲文化先。