又要頭痕，今個禮拜雖然新碟返密咗，但講到大卡士、大製作，依然冇晒影！倒不如輕鬆啲，睇齣一級浪漫喜劇啦！《豬法奇緣》擺明跟足童畫式故事，豬扒變靚女，爛佬變王子，呢類GoodEnding例牌出現，不過，索女姬絲汀娜莉芝變「豬」之後，唔知仲有冇咁索呢。想知？買DVD睇啦！
記者：陳國輝
嚇鬼指數
二世祖
生於上流社會，準備向豬女求婚，點知初次見面即露出驚嚇表情，仲慘過見鬼。
求婚漢
同二世祖一樣，想向呢名有錢女約會求婚，但係見到豬扒之後，立即嚇到跳窗逃生！
豬媽
身為豬女媽，當然愛錫自己個女，不過有記者將佢醜化成厲鬼咁款，唔嚇暈就假！
小妹妹
最天真無邪嘅小妹妹，唔覺意拎起豬女張證件相，冇嚇親不特止，仲非常好奇。
豬友
離家出走後認識咗兩位好朋友，佢哋唔單止唔介意豬女個怪相，仲好同情㖭！
記者
豬女喺公眾場合曝光後，各大傳媒爭相攝其容貌，至於嚇唔嚇鬼，已經唔再重要。
爛佬窮追豬扒
大部份愛情片總離不開「因誤會而結合」呢種元素，《豬法奇緣》中正下懷，男主角既爛賭亦口臭，卻因被指使要拍攝豬女嘅容貌並登上報刊，所以認識咗豬女，後來發現二人極為投緣，爛佬愛上豬女，更不惜改邪歸正。嫌橋太老套，不妨睇另一名二世祖，佢為錢不惜登門求婚，但見過豬女尊容，不但雞飛狗走，還派人攝其豬容，惡意登報中傷，簡直賤精一名。
毛冷質感細緻
假如想睇高清，暫時無緣了，皆因《豬法奇緣》只係推出咗VCD/DVD版，Blu-ray仲未有得睇；不過，呢套片嘅畫面質素絕對值得稱讚。其中最明顯一幕係女主角嘅毛冷頸巾，紋理細緻，連質地係乜，唔使摸已經睇到，至於另一幕洗白白鏡頭，即使背景熄晒燈，漆黑一片，然而牆磚用料以至浴缸亮麗嘅一面，完全表露無遺，作為DVD有咁嘅質素，認真唔錯！
買DVD送護膚品
至於DVD內所謂嘅Bonus，其實只不過係將訪問、製作花絮、刪減片段等炒埋一碟，冇乜噱頭可言；但對女性嚟講，總算有所收穫，原因係買碟會附送「雪映明肌牛初乳潔面粉」三包，睇完DVD後，仲可以免費用埋護膚品潔面，都諗得過㗎！
魔咒禍後代
背景要講番好耐好耐以前……因豬女祖先中咗魔咒，延禍後幾代，所以佢出世就長出一個豬鼻，令到父母極之擔心。據講，唯一解咒方法，就係要嫁個有錢老公！喺數百次徵婚過程當中，佢傷心過，又憤怒過，終於有一次，俾佢搵到真心又唔嫌棄其容貌嘅真命天子。
《豬法情緣》Profile
導演：馬克柏倫斯基
演員：姬絲汀娜莉芝、占士麥艾禾、麗絲韋花斯潘
類別：浪漫喜劇
畫面：2.35比1
字幕：中、英
級別：I
售價：$99