選戰揭幕，各大黨派爭崩頭搶閘報名，不過八方粗略統計歷年賽果，報名先後同當選機會冇關係，排頭位出閘，唔一定可以領先奪標，唔少騎呢候選人絞盡腦汁搶飲頭啖湯，最終都係敗選而回，社民連表面上聲大夾惡，其實粗中有細，噚日一於反其道而行，唔搶韁報名，寧願霸頭位抗議，仲搶鏡。
踩唐唐場變造勢大會
長毛噚日一早就去到尖沙嘴，直踩當局舉行「二○○八年立法會選舉」宣傳活動揭幕儀式會場，佢同幾名社民連成員先喺場外拉橫額嗌口號，要求2012雙普選，反官商勾結、反小圈子選舉等等，之後就進入會場。
由於長毛係議員，所以獲安排坐喺前排，等到政務司司長唐英年等高官到場，活動未開始前，佢一個箭步走到唐唐身旁，先同佢握手，之後又再嗌一次上述口號，保安人員同工作人員見狀立即上前阻止，不過長毛見好就收，事成後就離開。
長毛離開之際，有唔少在場人士報以掌聲，長毛高舉雙手接受群眾掌聲，唔知道個場係政府嘅，隨時以為係社民連地頭，去咗長毛造勢大會㖭。所以話，出位唔一定要捱通宵同人爭位，而且爭得到亦未必好，長毛咁做仲着數。
靠示威抗議起家嘅長毛，選舉拉票都不出呢兩招，其他人各有招數，已表明會跟葉劉條隊，博「掹衫尾」當選嘅史泰祖醫生，噚日以醫委會委員身份出席醫務聆訊，由於有公務在身，佢當然唔得閒報名，但唔代表唔可以出位。
話說聆訊期間，變靚D主席蕭若慈作供時話，其公司畀醫生每個症劃一60蚊佣金，因為診症時間一般都差不多。史泰祖即時提出質疑，仲乘機大發議論，指醫生唔可能每次診症時間都一樣，私人醫生會因為診症時間長而收取較高費用。
史泰祖越講越興奮，在場人士都覺唔妥，最後醫委會主席麥列菲菲都忍唔住出聲，提醒史醫生正進行聆訊，唔係主持公眾教育講座，希望佢唔好再長篇大論，史醫生先至收聲。其實史醫生未來個幾月時間大把機會講嘢，唔使急於喺醫委會聆訊上噴口水喎。