噚日舉行自訂車牌拍賣，有「地產教父」之稱嘅中原地產董事總經理郭昶對「JAS0N」情有獨鍾，頻頻舉手承價，但叫到11萬就收手，結果心頭好就以11.5萬拱手讓人。細問之下，原來郭總係為乖仔Jason出手投牌做生日禮物，不過Jason年僅10歲，即係就算投到，最少都要擺埋八年先有用，郭總唔止係「地產教父」，仲係「地產慈父」。郭總話11萬買個牌過火位，日後買「JAS0NK」或者「JAS0N8」一樣。
慈父空手而回，魔鬼就得手，陳先生以4萬蚊投得「DEV1L」牌，因為公司名叫魔鬼，公司從事甚麼業務不透露，淨係話價錢好合理。
一萬買起「一家人」
一句「我願意」值幾錢？「1DO」4萬蚊有交易，二人世界難求，一家人卻易得，「FAM1LY」1萬元賣出。全日最高價係先生「MR」，以20萬元成交，而「JH」同「TK」，分別以18萬元同13萬元成交；而「TAX1」則以7.5萬元成交。噚日推出244個自訂車牌拍賣，全日拍賣共得299萬元。