現時日聯9成外援來自巴西，但近期大宮松鼠羅致斯洛文尼亞國家隊隊長拿夫域，以佢名氣同踢法，相信會令日本球壇出現新景象。
現年27歲嘅拿夫域係柱躉式中鋒，身高1米90，重82公斤，身形有好大優勢，而且頭槌功架一流。拿夫域17歲就出道，03年離開家鄉加盟克羅地亞勁旅夏德，由於斯洛文尼亞同克羅地亞兩地水火不容，拿夫域半年後離隊。
現任斯洛文尼亞隊長
04年拿夫域轉投德乙特雷斯登尋求挑戰，好快得到重用，以17球成為聯賽次席射手，僅次於當時效力科隆嘅普多斯基，並轉投升班馬杜伊斯堡；隨後更入選斯洛文尼亞國家隊。佢喺場上表現落力，而且人緣甚佳，去年開始更戴上國家隊隊長臂章。
去年夏天，好多球隊都希望邀請拿夫域加盟，當中包括西班牙貝廸斯、法國索察及一些英格蘭球隊，但卻被杜伊斯堡會長保馬阻止，感到相當憤怒嘅拿夫域與球會交惡，拒絕續新約。
效忠松鼠棄踢世盃外
今季結束後，拿夫域終於回復自由身，並接獲多間海外球會賞識，佢最終選擇加盟松鼠，接受另一個新挑戰。拿夫域表示：「日本人相當友善，賽事好有組織，加上松鼠非常有誠意，派球會總監到德國與我接洽，令我感到非常受重視。之前我與杜伊斯堡高層鬧得不快，希望去到日本後，可專心踢波。」
拿夫域首場比賽，就係7月12日對磐田山葉比賽下半場入替，雖然曾有一個入球被判詐糊，但表現相當出色。拿夫域已表態拒絕代表國家隊上陣，意味佢將放棄參加世界盃外圍賽，專心為松鼠爭取好成績，足見佢對新球會非常重視。拿夫域，我代表所有日本球迷歡迎你！
作者簡介：2001年開始擔任足球賽事自由撰稿人，曾親身採訪各項大賽，包括世界盃、亞洲盃及非洲國家盃等。現為香港賽馬會足智彩網頁撰寫球評分析。