甄子丹長期忙在內地拍戲，培育4歲囡囡甄濟如（Jasmine）及7個月大囝囝甄濟嘉（James）的責任便落在太太（Cissy）身上。27歲的Cissy母兼父職一點也不敢鬆懈，與囡囡建立無所不談的親子關係，同時亦緊守嚴母角色，不過子丹一回港即縱壞女兒，令Cissy十分𤷪𤺧。至於貪靚的Jasmine，小小年紀化身模特兒行catwalk已毫不怯場，盡顯表演天份，Cissy表示絕不介意女兒長大後加入娛樂圈，更希望兒子James長大後當整容醫生。 撰文：梁錦雯
甄子丹與來自加拿大的汪詩詩於03年結婚，育有4歲女兒甄濟如及7個月大的兒子甄濟嘉，合組四人的幸福家庭。由於子丹長期在內地拍戲，照顧一對子女的重責便落在Cissy身上，母兼父職的Cissy日前接受訪問時表示：「子丹一要開戲，就有幾個月唔喺香港，佢負責賺錢養家，我就負責照顧一對小朋友，要做埋爸爸角色，好似自己以前從來唔多做運動，但又希望Jasmine身體好啲，於是就迫自己陪個女做運動，連自己嘅喜好都變晒。」
上海人家教嚴厲
Cissy表示初當母親時，感受到教小朋友的壓力，她說：「自己喺呢方面冇經驗，好多時都係學番媽咪教我嘅一套，再加上自己嘅想法。」汪詩詩是上海人，自小家教禮儀十分嚴謹，她稱：「雖然我喺加拿大同南美成長，但細細個屋企嘅家教好嚴，媽咪永遠係家中嘅權威，要我哋好有禮貌，儀容好整齊，我都好信奉平時對仔女要嚴一點，要放鬆時又可以相應調節，好似子丹家庭一向好casual，我就好堅持要有禮貌，Jasmine對住家人、工人都要有禮貌，坐姿要端正，我細個時成日都好似跳hiphop咁，行路fing身fing世，我認為從小要培養個人嘅禮儀，唔好睇少呢啲微細嘅地方，呢樣同讀書一樣終身受用，係人對你嘅第一個印象，好緊要。」
正如採訪當日，小小年紀的Jasmine已十分注重禮節，食三文治會主動要求先用紙巾拭去口紅，坐時又十分端正，一派小小淑女風範。
夫妻必須同立場
Cissy透露與Jasmine相處，同時要扮演嚴母及聆聽者的角色：「自己好lucky，有同小朋友溝通天份，Jasmine有乜都會同我講，有時佢會同我講I'mnothappy，同我講心事，大家好似朋友仔咁相處，不過我唔會令佢忘記我係媽咪嘅身份，會同佢講道理令佢明白。
「有時佢好百厭，尤其係子丹喺度嗰陣，真係好難教，因為子丹少見個女，所以都會縱佢，例如開飯時，子丹無端端開樽蘋果汁畀佢飲，搞到佢食飯冇晒胃口，我會好𤷪𤺧，有時遇到囡囡問他難題，又拋番個波畀我，搞到個女會有雙重標準，所以我會要求教女嗰時，子丹要同我立場一致。」
Cissy表示有時為教好Jasmine都要硬起心腸，她表示：「好似佢做錯嘢，我會罰佢一個人喺自己間房度靜思己過，因為Jasmine最怕寂寞，就算佢喊，我都唔可以心軟。」
子丹雖然工作很忙，但一有時間就十分黐家，Cissy大讚他是百分百住家好男人，她說：「佢一喺香港唔使開工，就成日喺屋企同個女玩，仲成日堅持一個人去接女放學，爭取二人世界。」
在電影世界中，子丹多拍動作武打片，Cissy表示暫時不會給Jasmine看他主演的電影，她說：「佢知道爸爸係演員，有時子丹拍戲受傷返嚟，都會畀個女睇爸爸嘅傷勢，等佢知道爸爸喺出面好努力咁賺錢，喺Jasmine心目中，覺得爸爸好強，好崇拜佢。」
拖住周汶錡行騷
Jasmine的性格十分外向，充滿表演天份，當日她與母親Cissy到童裝店gingerbread揀衫時很有主見，表明愛粉紅色調的衫，又要求塗唇膏，動作表情多多不怕羞，十分活潑，恍如小小模特兒，連Cissy都笑囡囡常常在家中聲言長大後要做模特兒，Cissy笑言：「好似佢3歲時，就試過同周汶錡同台行fashionshow，一啲都唔怯場，可能繼承咗子丹嘅表演天份。」
對於不少名人家長都反對兒女從事娛樂圈，Cissy卻持開放的態度：「佢daddy都係做呢行，養活一家，如果個人要壞，喺學校都會壞，最緊要係佢自己開心最緊要。」思想洋化的Cissy笑言對Jasmine沒有甚麼要求，反而對兒子James有所期待，她笑言：「個仔大咗有自己女朋友，之後有自己家庭，最後都係跟老婆唔睬我，希望個仔大個做整容醫生，到時佢都可以takecare我，見吓佢。」
扮靚3部曲
心形畫顯愛常在
小朋友課外活動多籮籮，分分鐘忙過大人。4歲的Jasmine亦不例外，除星期一至五上午返幼稚園，她現時學習芭蕾舞、畫畫、溜冰、彈琴及國語等課外活動，十分緊密。
Cissy認為：「會畀佢多啲選擇，因為有好多免費嘅trialclass（試班），之後再篩選佢唔鍾意嘅課程，好似佢唔鍾意一個group嘅形式學彈琴，又會心散，𠵱家就會係屋企單對單上堂。」
Cissy透露與子丹都發掘到囡囡有不錯畫畫天份，如採訪當日，記者叫Jasmine畫媽媽的素描，她即主動畫了Cissy，子丹，她及弟弟James，小小年紀的她已甚有天份，Cissy笑言：「佢畫嘅所有人都係心形面，反映佢內心充滿愛。」Jasmine更笑言為Cissy在畫中換上曲髮造型，會有多一點新鮮感。
育兒心得：略施小計 消除妒忌
Jasmine的乳名是上海話「寶寶」，而囝囝James則是「心肝兒」，可見Cissy同樣愛錫一對子女。由於Jasmine出世時集萬千寵愛在一身，當Cissy陀着James時，已開始向榮升大家姐的Jasmine作心理調整，Cissy笑言：「好似我大妹妹圓圓六年，細個時媽咪又冇教，我覺得自己喺屋企做開queen，所以由細到大都唔鍾意妹妹，好妒忌佢，所以自己一有咗James，就不時向Jasmine灌輸愛錫細佬嘅思想。」
穿姊姊BB衫
Cissy透露曾閱讀過不少書籍，她說：「我生之前，成日代James送禮物畀Jasmine，又同佢講弟弟是gifttoJasmine，我生完James，知道Jasmine嚟醫院探James，第一個感覺好重要，我唔想畀佢第一眼見到我抱住BB，後嚟BB喊，Jasmine反而主動叫我抱BB，佢𠵱家好錫細佬，連佢嘅英文名都係佢改，好似James都係着Jasmine嘅BB衫，全部都係粉紅色，Jasmine都笑住話notforboy。」
睇故事書 惡補中文
於加拿大及南美國家長大，能操流利普通話、英語、廣東話、上海話及西班牙語的Cissy，希望Jasmine學習多國語言，她說：「因為小朋友好易吸收，我有時會同佢講西班牙話，不過我同子丹都好注重佢嘅中文教育，平時星期一至五都有普通話補習，我同Jasmine嘅中文程度差唔多，有時會畀多啲DVD佢睇，好似Jasmine最近好鍾意睇《功夫熊貓》（KungFuPanda），我哋已經睇咗三次，雖然佢想睇英文版，不過每次我都要佢睇中文版，等佢多啲機會學中文。」
Cissy又透露當子丹一有時間在家，便要他為囡囡補習中文，她說：「子丹一喺屋企，我就要佢攞住本中文故事書，教Jasmine中文。」
