立法會日前搞惜別晚宴，好多議員唔知道下屆仲有冇機會重返議會，所以滿場飛同官員以及同僚影相留念。白鴿黨李華明自己知自己事，據講都攞住相機周圍走，遇到食物及衞生局局長周一嶽，即刻拉住合照，更打蛇隨棍上，問嶽哥可唔可以印兩人合照喺選舉單張度，借局長嘜頭拉票，一於用得唔好嘥。
喺食物衞生問題上，白鴿黨一向係嶽哥忠實fan，就算煲呔玩親疏有別，嶽哥都拉實肥仔明，唔通向自由黨獻媚咩？
對於肥仔明要求，嶽哥唔單只冇托手踭，更加反問使唔使幫佢站台助選，令肥仔明有啲受寵若驚，不過佢話𠵱家煲呔嘅政府勢危，搵官員撐場禍福難料，所以都係心領算嘞。