「橋王」肥龍許仕仁唔做官，好多人估計佢回復自由身後會下海搵真銀，估唔到咁快成事，舊年11月，即係卸任政務司司長後不足半年，未過完一年「冷河」就同政協常委李大壯合組新公司，雖然公司暫時未有正式生意搞，但肥龍已過完「冷河」，相信好快就會大展拳腳。
紅色商人北京人脈廣
肥龍早幾年未回朝時，據講一直有低調地為富豪出謀獻策，今次打正招牌做生意，有人指佢可能想發大嚟搞。政壇耳語稱，其實月前政協常委喺北京開會，已流傳肥龍同李大壯拍檔消息。李大壯近年活躍中、港政經界，係策發會、醫管局成員，又係自由黨核心，知情人士指李大壯北京人脈廣闊，聞說與港澳辦主任廖暉有交情，因此深得自由黨主席田少器重，佢向外亦不諱言自己在黨內具影響力，早前甚至傳出佢有意出選立法會，不過佢噚日向八方否認，「冇咁嘅事，我啲細路仲細。」
可能怕惹是非，李大壯對同肥龍拍檔不願多談，只不斷讚肥龍好叻，又笑言新公司名為RH&LangLtd，雖然同肥龍英文名RafaelHui簡稱相同，但其實純屬巧合，「只係咁啱買到呢間空殼公司。」
外界形容李大壯係「紅色商人」，事實上佢身世都幾傳奇，係北洋軍閥張作霖曾孫，祖父張學銘係張學良兄弟，幾年前張學良病逝，佢話都有去夏威夷出席葬禮。李大壯自言本名張實，後來父母離異，初時跟媽媽鄭世吾姓，後母親改嫁，再改跟繼父姓李，現無意認祖歸宗改回姓張。家世特別，佢話細細個就識中央領導人，已故總理周恩來上門探望，仲抱起幾歲嘅佢錫咗幾啖。
李大壯創辦嘅中國概念（諮詢顧問）公司主要為外資「提供獨特的融入中國的途徑」，公司網頁標榜職員「具有公共部門的工作背景」，去年底中國概念（諮詢顧問）公司中環寫字樓被追租約18萬元。已然上位嘅李大壯，80年代做中國生意，買賣電線電纜、橡膠賺第一桶金，一年營業額達10億美元，後來代理Acer電腦卻蝕大本，幾年前又搞過直銷雪茄生意，佢百足咁多爪，加埋肥龍呢個港府前高官，相信日後大把世界。
mailto:[email protected]