余安安、萬寶寶、琦琦、LisaS.同「翻版關之琳」Jocelyn等一班名模名媛，前晚喺半島出席Forevermark同周大福嘅鑽石酒會，一片珠光寶氣。江若琳着住SoniaRykiel露膊裙、戴住招牌「大眼仔」，戰戰兢兢出場，佢話自己係第一次出席珠寶活動，江若琳話：「我大個女喇！今日大會畀咗50萬嘅鑽石我戴，真係一步一驚心，又有保安看守，我連廁所都唔敢去。」
萬寶寶唔信靚仔
江若琳話自己曾經收過男性朋友同fans送鑽石，不過最終都因為太貴重而退番畀人，莫非要等結婚先肯收巨鑽？佢話：「結婚都要10年、8年後喇，但求搵到個好老公就夠囉。」
至於久未露面嘅前人大委員長萬里孫女萬寶寶，前晚再次谷胸上陣，佢話𠵱家大多數時間喺北京，問佢有冇拖拍？萬寶寶就懶神秘話：「喺一段發展緊嘅曖昧關係入面，佢係外國人，喺北京做生意。」問佢對方靚唔靚仔，萬寶寶就話：「靚仔冇用，靚仔唔可靠，佢哋唔會照顧人，我都曾經俾人傷害過。」
另外，琦琦着住一身Valentino粉紅晚裝裙，早輪有女模話俾人介紹不道德工作，琦琦話自己一入行嚟到香港，就識到任達華，所以都無遇過呢種事，提到可會有闊太打任達華主意？琦琦就笑住話：「我就係嗰個闊太囉！」
