教育局局長孫公日前出席立法會惜別晚宴時疑似飲大咗，噚日孫公開完財委會會議，有記者問佢當晚何事咁開心，要開懷暢飲，孫公卻否認貓咗，「冇，我冇飲醉。」之後面紅紅咁快閃走人。
卿姐：無謂再講
雖則孫公強調自己冇醉，不過議員劉秀成卻向八方表示，好肯定孫公當晚貓咗，佢又話一日都係中指黃累事，事關佢帶咗好多一級茅台嚟同大家暢飲，又頻頻勸酒，搞到好多人貓晒。大家以為孫公好酒量，點知都出事，除咗孫公，據稱醫學界議員郭家麒都飲唔少，晚宴尾聲甚至冧埋成個瞓低，好彩冇發生失儀事件。
遭孫公酒後搭膊頭嘅卿姐，噚日不欲多談詳情，「無謂再講嘞！」至於孫公係咪飲醉，佢答得好妙，「總之主要官員唔好飲咁多酒，你哋（記者）都唔好飲咁多酒呀！」《基本法》寫明主要官員不得有外國籍啫，冇話唔畀飲酒，卿姐𠵱個要求，怕且政府好難接受，而且根據煲呔邏輯，冇明文寫住唔准做，即係可以做，所以副局可以有外國籍。